नाशिक रोड : उमेश देशमुख
आधुनिक तंत्रज्ञानाच्या युगात कृत्रिम बुद्धिमत्ता अर्थात आर्टिफिशियल इंटेलिजन्स (AI) हे शिक्षण, विज्ञान, उद्योग, संशोधन आणि रोजगाराच्या क्षेत्रात झपाट्याने महत्त्वाचे ठरत आहे. या बदलत्या तंत्रज्ञानाची विद्यार्थिनींना ओळख व्हावी आणि भविष्यातील संधींसाठी त्यांना सक्षम करता यावे, या उद्देशाने लीनेस क्लब नाशिक रोड यांच्या वतीने भोसला मिलिटरी स्कूलमधील विद्यार्थिनींसाठी विशेष एआय प्रशिक्षण कार्यक्रम आयोजित करण्यात आला.
या प्रशिक्षणादरम्यान विद्यार्थिनींना एआय म्हणजे काय, त्याचा दैनंदिन जीवनातील वापर, शिक्षणामध्ये एआयची भूमिका, माहितीचे विश्लेषण, सर्जनशीलता वाढविण्यासाठी एआयचा उपयोग तसेच भविष्यातील विविध क्षेत्रांमध्ये कृत्रिम बुद्धिमत्तेमुळे निर्माण होणाऱ्या संधी याबाबत मार्गदर्शन करण्यात आले.
‘आजचे विद्यार्थी हे उद्याचे तंत्रज्ञानाचे नेतृत्व करणारे नागरिक आहेत’, या दृष्टिकोनातून विद्यार्थिनींमध्ये तंत्रज्ञानाबाबत कुतूहल, वैज्ञानिक दृष्टिकोन आणि डिजिटल कौशल्ये विकसित करण्यावर प्रशिक्षणामध्ये भर देण्यात आला. एआयचा योग्य आणि जबाबदारीने वापर केल्यास शिक्षण अधिक प्रभावी, सुलभ आणि सर्जनशील होऊ शकते. त्यामुळे विद्यार्थिनींनी केवळ एआयचा वापर करणाऱ्या नव्हे, तर एआयच्या मदतीने नवनवीन कल्पना आणि उपाय विकसित करणाऱ्या भविष्यातील सक्षम नेतृत्वकर्त्या बनावे, हा या उपक्रमामागील प्रमुख उद्देश असल्याचे आयोजकांनी सांगितले.
भोसला मिलिटरी स्कूलमधील विद्यार्थिनींनी या प्रशिक्षणाला उत्स्फूर्त प्रतिसाद दिला. आधुनिक तंत्रज्ञानाची माहिती प्रत्यक्ष उदाहरणांसह मिळाल्याने विद्यार्थिनींमध्ये एआयविषयी उत्सुकता आणि आत्मविश्वास वाढला. लीनेस क्लब नाशिक रोडचा हा उपक्रम विद्यार्थिनींना डिजिटल युगातील बदलत्या आव्हानांसाठी तयार करण्याबरोबरच त्यांच्या ज्ञानाला आणि कल्पनाशक्तीला नवी दिशा देणारा ठरत आहे.
एआय प्रशिक्षण विषयी तज्ञ श्री सचिन मुळे सर आणि स्किन केअर बद्दल डॉ.श्रद्धा सोननीस यांनी माहिती दिली. क्लबच्या अध्यक्ष वैशाली राठोड यांनी मान्यवरांचे स्वागत केले.
भोसला मिलिटरी स्कूल येथील नासिक विभागाचे चेअरमन इंजिनिअर संजय पगारे यांनी भोसला मिलिटरी स्कूल बद्दल अतिशय सुंदर माहिती दिली.प्राचार्या मेजर सपना शर्मा आणि गर्ल्स चेअरमन वसुधा कुलकर्णी यांचीही मोलाचे सहकार्य मिळाले.कार्यक्रमाच्या विशेष अतिथी अंजली विसपुते प्रथम बहुप्रांत अध्यक्षा यांनी कार्यक्रमाचे लीनेस क्लब तर्फे आयोजन केले.
पीएमडीपी सुनीला नरपन्नवार विशेष अतिथी,मुख्य अतिथी बहुप्रांत अध्यक्ष अलका डोंगरे,प्रांत अध्यक्ष नीलम परदेशी होते.यावेळी संगीता गायकवाड, डॉ. मीना पाटील,क्लब मेंबर, शालिनी भरसाखर, भारती सुळे, मेघा पिंपळे नीलिमा अवथनकर, प्रतिभा कुंभकर्ण, उषा पिंपळे ,भाग्यश्री सोनवणे ,स्मिता सोनवणे उपस्थित होते. सूत्रसंचालन मेघा पिंगळे यांनी केले.
