529 Post Views
नाशिकरोड : उमेश देशमुख
नाशिक महापालिका निवडणुकीत महायुतीने एकत्रित लढायचे की शिवसेनेने स्वतंत्र निवडणुक लढवावी, याबाबत प्रभागवर कार्यकर्त्यांचे मत जाणून घेतले जाईल. त्याचप्रमाणे याविषयी वरिष्ठ नेत्यांची बैठक घेतली जाणार आहे. त्यामध्ये अंतिम निर्णय घेऊ, अशी माहिती शिवसेना शिंदे गटाचे नाशिक जिल्हाप्रमुख अजय बोरस्ते यांनी सांगितले.
राज्याची विधानसभा निवडणूक महायुतीने एकत्रित लढवली. यामध्ये घवघवीत यश मिळाले.त्यामुळे आगामी स्थानिक स्वराज्य संस्थेच्या निवडणुका महायुतीने एकत्रित लढवायच्या की शिवसेनेने स्वतंत्रपणे लढवायची, याविषयी कार्यकर्त्यांमध्ये चर्चा केली जात आहे. नाशिक महापालिकेच्या निवडणुकीबाबत बोलायचे झाले तर लवकरच या संदर्भात आम्ही बैठक घेणार आहोत. बैठकीत निवडणुकीची रूपरेषा ठरवली जाईल, शहरातील प्रत्येक प्रभागातील शिवसेनेचे पदाधिकारी आणि कार्यकर्त्यांना विश्वासात घेतले जाईल.त्यांचे काय मत आहे, त्यांच्या प्रतिक्रिया काय आहेत, त्यांच्या अडचणी व समस्या याविषयी त्यांची मते जाणून घेणार आहोत, सर्वांच्या सर्वानुमते जो काही निर्णय होईल तो वरिष्ठ पदाधिकाऱ्यांना कळविला जाईल.त्यानंतर नाशिक शहरांमध्ये शिवसेनेने स्वतंत्रपणे महापालिकेची निवडणूक लढवायची की महायुतीमध्ये एकत्रित निवडणूक लढवायची, याबाबत निर्णय होईल, असे जिल्हाप्रमुख अजय बोरस्ते यांनी स्पष्ट केले.
नांदूर मानूर परिसरात विवाह समारंभासाठी एकमेव सुसज्ज संजीवनी ए.सी. बँक्वेट मंगल कार्यालय
विधानभेत निष्ठेने काम
विधानसभा निवडणुकी संदर्भात बोलताना शिवसेनेचे जिल्हाप्रमुख अजय बोरस्ते यांनी म्हटले की,शहरातील नाशिक पूर्व,नाशिक मध्य आणि नाशिक पश्चिम मध्ये भारतीय जनता पार्टीच्या उमेदवारांचे काम शिवसेनेने अतिशय प्रामाणिकपणाने केले. सर्व पदाधिकाऱ्यांनी, शिवसैनिकांनी एकजुटीने महायुतीचे काम केले. त्याला भाजपच्या आणि राष्ट्रवादी काँग्रेस अजितदादा पवार यांच्या पदाधिकाऱ्यांचे देखील दुमत नाही. एकत्रित लढलो तर आमची ताकद निश्चित वाढणार आहे.
सन्मान जनक जागा हव्यात : बाबुराव आढाव, अध्यक्ष नाशिकपूर्व विधानसभा मतदारसंघ
नाशिक महापालिका हद्दीमध्ये प्रामुख्याने तीन मतदार संघ आहे. विधानसभा निवडणुकीत महायुतीने एकत्रित काम केले. पर्यायाने तीन मतदार संघात महायुतीचे उमेदवार निवडून आले. महापालिकेच्या आगामी निवडणुकीत महायुतीने एकत्रित लढले तर संख्याबळ निश्चित वाढेल. एक हाती सत्ता महापालिकेवर येईल, नाशिक महापालिकेवर भगवा देखील फडकेल. परंतु जागा वाटपामध्ये शिवसेनेला सन्मानपूर्वक जागा हव्या आहेत, तसे झाले नाही तर आम्ही सहन करणार नाही. अशावेळी स्वतंत्रपणे निवडणुका लढवाव्यात, अशी स्पष्ट भूमिका नाशिक पूर्व विधानसभा मतदारसंघाचे शिवसेनेचे प्रमुख विनायक ( बाबुराव ) आढाव यांनी मांडली.
